Шекпээр
Дүүн, Февраль 16-да, Шекпээр сумузунуң Базыр-оол Ооржак аттыг культура одааның девискээринге, суурувустуң Хову, М. Марат-оол кудумчуларының "Сайзырал" аттыг агитквартиразының удуртулгазы-биле "Шагаа - 2018" байырлалынга культурлуг хемчеглер болуп эрткен. Шагаа байырлалының ажыдыышкыны, суурувустуң субурганын бүдүн чон-биле долганып, кадак, чаламалар азары-биле эгелээн. Кижи бүрүзү, чаа үнүп келген 9 кызыл меңгилиг, чер олуттуг сарыг ыт чылынга йөрээл салып, чалбарып тейлеп келген. Чаа чагган харга, идик-хевин кактап, эрги чылдың хир-чамындан арыгланганы база бир ханы утканы киирген. Байырлалдың оюн-тоглаазы, ыры-шоору, аъштыг-чемниг шайлалга-даа эгелээн. Аалчы чон көвүдеп, мөөрейлерге киржир күзелдиглер удаа-дараа аттарын бижидип, Шагаа байырлалы бодунуң шуудунда барган. Оюннарны удуртуп эртирип турар башкарыкчыларның шалыкпыны-биле, мөөрейлер шынарлыг болгаш дүрген-дүрген эрткилеп турган. Шыдыраа маргылдаазынга бирги черге, суурнуң арга-дуржулгалыг шыдыраачызы Хомушку Эрес төлептиг болган. Тыва национал идик-хеп көрүлдезинге, Меңги, Марьяна Ооржактарның өг-бүлезиниң хеп-сыны эң дээре деп үнелеткен. Чагы бажынче үнер мөөрейге Сарыглар Шолбан тергиин көргүзүглүг болган. Командалар аайы-биле канат тырттар мөөрейге, Шекпээр ортумак школазының коллективи тиилекчи болганнар. Даш көдүрер мөөрейге, эң мөге-шыырак киржикчи Салчак Начын болган. Байырлалдың база бир солун кезии, Шагаа байырлалынга тураскааткан лоторей билеттериниң ойнадылгазы. Ойнадылганың шаңналдары арбын болгаш, ниитизи-биле солун байдалга эрткен. Лоторей ойнадылгазының эң кол шаңналы - хой. Ойнакчылар шупту улуг идегелдиг манаашкында. Соскаал чокка долганып турар барабандан лоторей билеттери удаа-дараа уштунуп-ла турар. Түңнелинде Шекпээривистиң "Шагаа - 2018" байырлалының эң аас-кежиктиг ойнадып алыкчызы илереттинген. Ол болза Шекпээр ортумак школазының өөреникчизи Сумбуу Сайын болган. Шагаа байырлалының база бир көрүштүг кезии, херээжен улус аразынга сумо хүрежи. Эң тулган сумоист Күжүгет Айдана болган. Байырлалдың түңнел кезии, тыва хүреш. Мөгелерниң ачыр-дачыр хүрежип келгениниң түңнелинде, Шекпээр сумузунуң "Шагаа - 2018" байырлалынга шүүлген мөге Сылдыс Ооржак болган. Үжүрлешкен мөге, суурувустуң база бир шыырак мөгези Аян Ооржак. Үшкү, дөрткү черлерни Монгуш Айдың, Монгуш Агым алышкылар ээлен. Ниитизи-биле, суурувуска Шагаа байырлалы бедик деңнелге, хөй чоннуң идекпейлиг киржилгези-биле, солун байдалга эрткен. Чаңчыл аайы-биле, келир чылын Шагаа байырлалын удуртуп эртирери-биле, Шет биле Культура кудумчуларының агитквартираларынга дамчыткан.
Суурувуска, "Шагаа - 2018" байырлалынга культурлуг хемчеглер шак мынчалдыр бедик деңнелге эрткен. Чонувустуң болгаш бистиң мурнувустан, "Сайзырал" агитквартиразынга өөрүп четтиргенивисти илереттивис. Эр-хейлер!
