Шагаа 2018ч.
Дүүн февраль 10-да, Шекпээр сумузунуң Кара-Даш деп черге, Меңги Борисович, Марьяна Олеговна Ооржактарның өдээнге Каткылыг, Үттүг-Хая малчыннарының Шагаа байырлалы болуп эрткен. Байырлал ниитизи-биле эки эртип, чон-даа хөй, аъш-чем элбек, суй-белектери эки болган. Шагааның эрткен хемчеглери: аът чарыжы, 3 аңгы хевирге: аныяк, улуг, чоруктуг аъттар, кажык, тевек, аът бажы шалбалаары, кожаңнар мөөрейи, сумо хүреш, тыва хүреш дээш мындыг янзылыг мөөрейлер болуп эрткен. Оюннарга чүгле малчыннар эвес, Барыын-Хемчик кожууннуң 9 сумузунуң чурттакчы-чону, Ак-Довурак, Чадан, Чөөн-Хемчиктен, Кызыл хоорайдан мөгелер, аът мунукчулары, тевекке болгаш өске-даа оюннарга киржип келгеннер.
Сумунуң Баштыңы, Хурал даргазы Монгуш С. К. чагырга даргазы Ооржак А. М, Тыва Республиканың Чазак Даргазының бүрүн эргелиг төлээзи Сарыглар С. М. кожууннуң Көдээ ажыл-агый эргелелиниң даргазы Соян А. А, кол зоотехниги Монгуш К. К келгеш чонга байыр чедиргеннер. Чонну эртиржиринге, культурлуг-массалыг хемчеглерге Барыын-Хемчик кожуунуң "Олег Намдараа" аттыг культура төвүнүң артистери чонга бараан болуп ыры-самын бараалгатканнар. Белектер-даа хөй болган, эзер, чүген, аргамчы, хевистер дээш оон-даа өске. Хүрешке ниитизи-биле 36 мөге хүрешкен. Шүүлген мөге, Күжүгет Шалбачы, хеп чуур машина алыр аас-кежиктиг болган. (Аксы-Барлык) Үжүрлешкен мөге Күжүгет Дозураш болган. (Аксы-Барлык) Үшкү черни ээлээн мөге Күжүгет Алик (Ак-Довурактың мөгези).
Улуг аъттар чарыжынга - Аянгаты аъды эрткен.
Аныяк аъттарга - Шекпээрден, Сарыглар Шораанның аъды эрткен.
Ол-ла өдекте, угба-честези-биле кады мал-маганын өстүрүп орар аныяк малчыннарывыс, 2017 чылдың "Аныяк өг-бүлеге - Кыштаг" деп төлевилелдиң киржикчилери Кара-Сал Айбек болгаш Ооржак Чейнешке база чедиишкиннерни күзедивис!
